<div style='font-size: 22px!important;line-height: 34px!important;text-align: justify!important;color: #000!important'>སྲིད་གཞུང་གི་ལས་དོན་སྙན་སྒྲོན། (གནད་བསྡུས)</div><div style='font-size: 14px!important;line-height: 22px!important;text-align: left!important;color: #777!important;margin-top: 20px;'>林芝报-藏文版  2026-03-17</div><div><img id='paperImg' style='max-width: 100%;height: auto' src='//img.founderfx.cn/epaper/202603/17/19f52ac19bd74a9491f97c72b42260f2/3.jpg' alt='' class='page-img'/></div><p>“ལོ་ལྔ་ཚན་བཅོ་ལྔ་པའི”དམིགས་འབེན་གཙོ་བོ།</p><p>《རྒྱལ་དམངས་དཔལ་འབྱོར་དང་སྤྱི་ཚོགས་གོང་དུ་སྤེལ་བའི་ལོ་ལྔ་ཚན་བཅོ་ལྔ་པའི་འཆར་འགོད་གཏན་འབེབས་བྱ་རྒྱུའི་སྐོར་གྱི་ཀྲུང་གུང་ཀྲུང་དབྱང་གི་གྲོས་གཞི》གཞིར་བཟུང་། རྒྱལ་སྲིད་སྤྱི་ཁྱབ་ཁང་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་དམངས་དཔལ་འབྱོར་དང་སྤྱི་ཚོགས་གོང་དུ་སྤེལ་བའི་ལོ་ལྔ་ཚན་བཅོ་ལྔ་པའི་འཆར་འགོད་རྩ་གནད(མ་ཟིན)》བཟོས་ཏེ། ཚོགས་ཆེན་ལ་ཞིབ་བཤེར་གནང་རྒྱུར་ཕུལ་བ་ཡིན། འདིར་དམིགས་འབེན་དང་དམིགས་ཚད་གཙོ་བོ་དང་། འཐབ་ཇུས་ཀྱི་ལས་འགན་གལ་ཆེན། ལས་གྲྭའི་རྣམ་གྲངས་གལ་ཆེན་བཅས་ཀྱི་སྐོར་སྙན་ཞུ་མདོར་བསྡུས་འབུལ་རྒྱུ་ཡིན།</p><p>■ དམིགས་འབེན་དང་དམིགས་ཚད་གཙོ་བོའི་སྐོར།</p><p>ཏང་ཀྲུང་དབྱང་གི《གྲོས་གཞི》ཡི་ནང་གཏན་འཁེལ་ཁ་གསལ་བྱས་པའི་དམིགས་འབེན་གཙོ་བོ་ལག་བསྟར་དོན་འཁྱོལ་བྱེད་ཆེད། 《རྩ་གནད(མ་ཟིན)》ནང་དུ་ཞིབ་ཕྲའི་དམིགས་ཚད་གཙོ་བོ་ཁག་20བཏོན་ཡོད་དེ། དཔལ་འབྱོར་འཕེལ་རྒྱས་ཐད་ནས། འཕར་སྣོན་དང་། གྲུབ་ཚུལ། ལས་ཆོད་བཅས་ལ་དམིགས་ནས་དམིགས་ཚད་ཁག་3བཏོན་ཡོད་ལ། དེའི་ནང་དུ་རྒྱལ་ཁབ་ཕྱི་ནང་གི་གནས་བབ་དང་ཕྱོགས་གང་ཅིའི་ཐད་ཀྱི་རྒྱུ་རྐྱེན་ལ་ཕྱོགས་བསྡུས་ཀྱིས་བསམ་བློ་བཏང་ཞིང་། དགོས་མཁོ་དང་འབྱུང་སྲིད་པ་གཉིས་ཀར་ལྟ་རྟོག་བྱས་ཏེ། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་འཕར་ཚད་ལུགས་མཐུན་གྱི་བར་སྟོང་ནང་སྲུང་འཛིན་བྱེད་པ་དང་། ལོ་འཁོར་སོ་སོར་གནས་ཚུལ་ལ་གཞིགས་ནས་བཏོན་ཏེ། 2035ལོར་སླེབས་སྐབས་མི་རེའི་ཆ་སྙོམས་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་2020ལོ་ལས་ལྡབ་གཉིས་འཕར་ཏེ། དར་རྒྱས་འབྲིང་ཙམ་བྱུང་བའི་རྒྱལ་ཁབ་ཀྱི་ཆུ་ཚད་དུ་སླེབས་རྒྱུར་རྨང་གཞི་ཡག་པོ་འདིང་དགོས་ཚུལ་བཏོན་ཡོད། དམངས་འཚོའི་བདེ་རྩའི་ཐད་ནས། མི་དམངས་མང་ཚོགས་ཀྱི་བྲེལ་དཀའ་སྡུག་སྨོན་བཞིའི་གནད་དོན་སྔར་ལས་ལེགས་པར་ཐག་གཅོད་བྱ་ཆེད། དམིགས་གཏད་རང་བཞིན་ཡོད་པའི་སྒོ་ནས་ལས་ཞུགས་དང་། ཡོང་འབབ། སློབ་གསོ། སྨན་བཅོས། བདེ་ཐང་། “རྒན་གཅིག་བྱིས་གཅིག”སོགས་ཀྱི་དམིགས་ཚད་ཁག་7བཏོན་ཡོད། ལྗང་མདོག་ཐཱན་ཉུང་ཐད་ནས། ཐཱན་གཅོག་སྦགས་འཕྲི་དང་སྐྱེ་ཁམས་ཁོར་ཡུག་སྲུང་སྐྱོབ་སོགས་ལ་དམིགས་ནས་དམིགས་ཚད་ཁག་5བཏོན་ཡོད། བདེ་འཇགས་འགན་སྲུང་ཐད་ནས། འབྲུ་རིགས་དང་ནུས་ཁུངས་ཐོན་སྐྱེད་ནུས་པར་དམིགས་ནས་དམིགས་ཚད་ཁག་2བཏོན་ཏེ། རྒྱལ་ཁབ་བདེ་འཇགས་ཀྱི་རྨང་གཞིའི་འགན་སྲུང་གལ་ཆེན་ནུས་ཤུགས་ཡོད་རྒུས་བརྟན་དུ་གཏོང་དགོས་ཚུལ་བསྟན་ཡོད།</p><p>■ འཐབ་ཇུས་ཀྱི་ལས་འགན་གལ་ཆེན་སྐོར།</p><p>《རྩ་གནད(མ་ཟིན)》ནང་དུ་ཁྱབ་ཁོངས་ཕྱེ་ནས“ལོ་ལྔ་ཚན་བཅོ་ལྔ་པའི”སྐབས་སུ་འཕེལ་རྒྱས་གཏོང་བའི་འཐབ་ཇུས་ཀྱི་ལས་འགན་གལ་ཆེན་རྒྱས་བཤད་བྱས་ཡོད་ལ། ཕྱོགས་བཞིའི་ཐད་ནས་མངོན་གསལ་དོད་པོས་མཚོན་ཡོད།</p><p>གཅིག་ནི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་མངོན་གསལ་དོད་པོས་མཚོན་ཡོད། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་རྒྱུ་ནི་སྤུས་ཚད་མཐོ་བའི་འཕེལ་རྒྱས་ཀྱི་ནང་གནས་བླང་བྱ་ཡིན། 《རྩ་གནད（མ་ཟིན)》ནང་དུ་ཚན་རྩལ་གསར་གཏོད་ཀྱི་སྣེ་ཁྲིད་ནུས་པ་ནན་བཤད་བྱས་ཡོད་ལ། དངོས་གཞིའི་དཔལ་འབྱོར་གྱི་རྨང་གཞི་སྲ་བརྟན་དང་རྒྱ་སྐྱེད་གཏོང་བ་དང་། སྔོན་ཐོན་བཟོ་སྐྲུན་ལས་རིགས་རྐང་འཛིན་ཡིན་པའི་དེང་རབས་ཅན་གྱི་ཐོན་ལས་མ་ལག་འཛུགས་པར་དམིགས་ཡོད། ཆུ་ཚད་མཐོ་བའི་ཚན་རྩལ་རང་ཚུགས་རང་དར་བྱེད་པ་དང་། ཐོག་མའི་གསར་གཏོད་དང་འགག་རྩའི་སྲོག་ཤིང་ལག་རྩལ་འགག་སྒྲོལ་བྱེད་ཤུགས་ཆེ་རུ་གཏོང་བ། གྲངས་ཀའི་ཀྲུང་གོ་འཛུགས་སྐྲུན་ལ་སྐུལ་འདེད་གཏིང་ཟབ་བཏང་ནས་གྲངས་ཀའི་དཔལ་འབྱོར་གྱི་ལྟེ་བའི་ཐོན་ལས་ཀྱི་རིན་ཐང་འཕར་མས་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་ནང་བཟུང་བའི་བསྡུར་ཚད་12.5%ལ་སླེབས་པར་བྱ་རྒྱུ་བཅས་ལ་དམིགས་ཡོད།</p><p>གཉིས་ནི་རྒྱལ་ནང་གི་རེས་འཁོར་ཆེན་པོ་སྟོབས་ཆེར་གཏོང་རྒྱུ། མངོན་གསལ་དོད་པོས་མཚོན་ཡོད། ཕྱིའི་ཁོར་ཡུག་རྙོག་འཛིང་དང་ཛ་དྲག་ཆེ་བའི་གནས་ཚུལ་འོག ནང་མཁོ་རྒྱ་སྐྱེད་གཏོང་རྒྱུའི་འཐབ་ཇུས་ཀྱི་གཞི་གནས་འདི་ངེས་པར་དུ་རྒྱུན་འཁྱོངས་བྱེད་དགོས། 《རྩ་གནད(མ་ཟིན)》ནང་དུ་རྒྱལ་ནང་གི་རེས་འཁོར་ཆེན་པོའི་ནང་སྐྱེས་སྒུལ་ཤུགས་དང་བློས་འགེལ་ཆོག་པའི་རང་བཞིན་ཆེ་རུ་གཏོང་བ་དང་། དམངས་འཚོར་ཕན་པ་དང་འཛད་སྤྱོད་ལ་སྐུལ་སྤེལ་གཏོང་བ་དང་། མ་དངུལ་དངོས་པོར་འཇོག་པ་དང་མ་དངུལ་མི་ལ་འཇོག་པ་ཟུང་འབྲེལ་དམ་པོ་བྱ་རྒྱུ་རྒྱུན་འཁྱོངས་བྱས་ཏེ། འཛད་སྤྱོད་ཆེར་སྐྱེད་ཤུགས་ཆེན་བྱེད་པ་དང་། གྲོང་མིའི་འཛད་སྤྱོད་བྱེད་ཚད་མངོན་གསལ་དོད་པོས་ཇེ་མཐོར་གཏོང་བར་སྐུལ་སྤེལ་གཏོང་བ། ཕན་ནུས་ལྡན་པའི་མ་དངུལ་འཇོག་རྒྱ་ཇེ་ཆེར་གཏོང་བ་བཅས་ལ་དམིགས་ཡོད།</p><p>གསུམ་ནི་མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བར་སྐུལ་འདེད་གཏོང་རྒྱུ་མངོན་གསལ་དོད་པོས་མཚོན་ཡོད། ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བའི་དེང་རབས་ཅན་ཡིན། 《རྩ་གནད(མ་ཟིན)》ནང་དུ་བུ་བཙའ་མཛའ་མཐུན་ཅན་གྱི་སྤྱི་ཚོགས་འཛུགས་སྐྲུན་བྱེད་པ་དང་། མི་འབོར་ལ་ཞབས་འདེགས་ཞུ་བའི་མ་ལག་ཆ་ཚང་དུ་གཏོང་བར་དམིགས་ཡོད། མི་དམངས་བློ་ཡིད་ཚིམ་པའི་སློབ་གསོ་ཡག་པོ་གཉེར་བ་དང་། ངལ་རྩོལ་ལོ་ཚད་ལོན་པའི་མི་འབོར་ལ་ཆ་སྙོམས་ཀྱིས་སློབ་གསོ་ཐོབ་པའི་ལོ་ཚད་ལོ་11.7བར་འཕར་བར་བྱེད་དགོས། བདེ་ཐང་ཀྲུང་གོ་དང་ལུས་རྩལ་རྒྱལ་ཁབ་སྟོབས་ཆེན་མགྱོགས་མྱུར་འཛུགས་སྐྲུན་བྱས་ནས། མི་རེའི་ཆ་སྙོམས་སྔོན་དཔག་ཚེ་ཚད་ལོ་80བར་རིང་དུ་གཏོང་དགོས། མི་འབོར་རྒན་རྒོན་ཅན་དུ་འགྱུར་བར་ཁ་གཏད་ཧུར་ཐག་འཇལ་བ་དང་། རྒན་གསོ་སྒྲིག་གཞིའི་ནད་སྐྱོང་ཅན་གྱི་ཉལ་ཁྲི་བཟུང་ཚད་73%བར་མཐོ་རུ་གཏོང་དགོས། སྤུས་ཚད་མཐོ་བའི་ལས་ཞུགས་གང་ལེཊ་ཡོང་བར་སྐུལ་སྤེལ་གཏོང་བ་དང་། ཡོང་འབབ་བགོ་བཤའི་ལམ་ལུཊ་འཐུས་ཚང་དང་སྤྱི་ཚོགཊ་འགན་སྲུང་མ་ལག་ཆ་ཚང་དུ་གཏོང་དགོས།</p><p>བཞི་ནི་འཕེལ་རྒྱས་དང་བདེ་འཇགས་གཅིག་གྱུར་འཆར་འགོད་བྱ་རྒྱུ་མངོན་གསལ་དོད་པོས་མཚོན་ཡོད། བདེ་འཇགས་ནི་འཕེལ་རྒྱས་ཀྱི་སྔོན་འགྲོ་ཡིན་ལ། འཕེལ་རྒྱས་ནི་བདེ་འཇགས་ཀྱི་འགན་སྲུང་ཡིན། 《རྩ་གནད(མ་ཟིན)》ནང་དུ་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་ལག་ལེན་མཐར་ཕྱིན་བྱས་ཏེ། རྒྱལ་ཁབ་ཀྱི་བདེ་འཇགས་མ་ལག་དང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་བར་དམིགས་ཏེ་ལས་འགན་དང་བྱེད་ཐབས་མང་པོ་བཏོན་ཡོད། འབྲུ་རིགས་དང་ནུས་ཁུངས་ཐོན་ཁུངས་སོགས་འདོན་སྤྲོད་འགན་སྲུང་བྱེད་ནུས་ཆེ་རུ་བཏང་སྟེ། འབྲུ་རིགས་ཕྱོགས་བསྡུས་ཀྱིས་ཐོན་སྐྱེད་བྱེད་ནུས་རྒྱ་མ་དུང་ཕྱུར་ཁྲི་1.45ཡས་མས་སུ་སླེབས་པར་བྱེད་པ་དང་། ནུས་ཁུངས་ཕྱོགས་བསྡུས་ཀྱིས་ཐོན་སྐྱེད་བྱེད་ནུས་ཚད་ལྡན་རྡོ་སོལ་ཏུན་དུང་ཕྱུར་58ལ་སླེབས་པར་བྱེད་དགོས། ས་ཁང་ཐོན་ལས་དང་། ས་གནས་སྲིད་གཞུང་གི་བུ་ལོན། ས་གནས་ཀྱི་དངུལ་རྩའི་སྒྲིག་གཞི་འབྲིང་ཆུང་སོགས་ཀྱི་ཉེན་ཁ་གོ་རིམ་ལྡན་པའི་སྒོ་ནས་སེལ་རྒྱུར་གཅིག་འདོམས་སྐུལ་འདེད་གཏོང་དགོས། སྤྱི་པའི་བདེ་འཇགས་བཅོས་སྐྱོང་ཆུ་ཚད་མཐོ་རུ་བཏང་ནས་སྤྱི་ཚོགས་ཀྱི་བདེ་འཇགས་བརྟན་བརླིང་ལ་སྲུང་སྐྱོང་ནུས་ལྡན་བྱེད་དགོས།</p><p>■ ལས་གྲྭའི་རྣམ་གྲངས་གལ་ཆེན་གྱི་སྐོར།</p><p>“ལོ་ལྔ་ཚན་བཅོ་ལྔ་པའི”དམིགས་འབེན་དང་ལས་འགན་དོན་ཐོག་ཏུ་འཁྱོལ་བར་སྐུལ་འདེད་གཏོང་བར་དམིགས་ཤིང་། འཐབ་ཇུས་རང་བཞིན་དང་། སྣེ་ཁྲིད་རང་བཞིན། རྒྱུན་མཐུད་རང་བཞིན་བཅས་ལ་གཅིག་འདོམས་བསམ་བློ་བཏང་སྟེ། 《རྩ་གནད(མ་ཟིན)》ནང་དུ་ཕྱོགས་6ཐད་ཀྱི་ལས་གྲྭ་གལ་ཆེན་ཁག་109བཏོན་ཡོད་ལ། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་ལ་སྣེ་ཁྲིད་བྱེད་པའི་ཐད་ནས། ཐོན་ལས་ཀྱི་རྨང་གཞིའི་ནུས་པ་དང་འགྲན་རྩོད་ཀྱི་ནུས་པ་ཆེ་རུ་གཏོང་བ་དང་། ཐོན་ལས་གསར་པ་དང་འགྲན་ལམ་གསར་པ་སྐྱེད་སྲིང་དང་འཕེལ་རྒྱས་གཏོང་བ། མདུན་གྲལ་གྱི་ཚན་རྩལ་འགག་སྒྲོལ་བྱེད་པ། གསར་གཏོད་ཀྱི་རྨང་གཞིའི་ནུས་པ་ཆེ་རུ་གཏོང་བ་བཅས་ལ་དམིགས་ནས་ལས་གྲྭ་ཁག་28བཏོན་ཡོད། དེང་རབས་ཅན་གྱི་རྨང་གཞིའི་སྒྲིག་བཀོད་མ་ལག་འཛུགས་པའི་ཐད་ནས། རྒྱལ་ཁབ་ཀྱི་ཕྱོགས་བསྡུས་འགྲིམ་འགྲུལ་དྲ་བ་དང་། ནུས་ཁུངས་མ་ལག་དཔེ་གསར། རྨང་གཞིའི་སྒྲིག་བཀོད་དཔེ་གསར། ཕྱི་ཕྱོགས་ལ་སྒོ་མོ་འབྱེད་པའི་ལས་སྟེགས་སོགས་ལ་དམིགས་ནས་ལས་གྲྭ་ཁག་23བཏོན་ཡོད། གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས་ལ་སྐུལ་སྤེལ་གཏོང་བའི་ཐད་ནས། གྲོང་ཁྱེར་དང་གྲོང་རྡལ་ཅན་དཔེ་གསར་འཛུགས་སྐྲུན་དང་། ཞིང་ལས་དང་གྲོང་གསེབ་དེང་རབས་ཅན་འཛུགས་སྐྲུན་ལ་དམིགས་ནས་ལས་གྲྭ་ཁག་9བཏོན་ཡོད། དམངས་འཚོ་འགན་སྲུང་དང་ལེགས་བཅོས་བྱེད་པའི་ཐད་ནས། སྤྱི་ཚོགས་རིང་ལུགས་ཀྱི་རིག་གནས་དར་རྒྱས་གོང་འཕེལ་གཏོང་བ་དང་། སྤུས་ཚད་མཐོ་བའི་སློབ་གསོའི་མ་ལག་འཛུགས་སྐྲུན། བདེ་ཐང་ཀྲུང་གོ་འཛུགས་སྐྲུན། “རྒན་གཅིག་བྱིས་གཅིག”གི་ཞབས་ཞུ་ལེགས་སྒྱུར། སྤྱི་ཚོགས་གཅེས་སྐྱོང་ཞབས་ཞུ་བཅས་ལ་དམིགས་ནས་ལས་གྲྭ་ཁག་25བཏོན་ཡོད། ལྗང་མདོག་ཐཱན་ཉུང་ཅན་དུ་རིགས་སྒྱུར་བྱེད་པར་སྐུལ་འདེད་གཏོང་བའི་ཐད་ནས། ཐཱན་རྩེར་སོན་དང་ཐཱན་སྙོམ་སྦྱོར་དང་། ཁོར་ཡུག་གི་སྤུས་ཚད་མཐོར་འདེགས། སྐྱེ་ཁམས་སྲུང་སྐྱོབ་དང་ཉམས་གསོ་བཅས་ལ་དམིཊ་ནས་ལས་གྲྭ་ཁག་18བཏོན་ཡོད། གཙོ་གནད་ཁྱབ་ཁོངས་ཀྱི་བདེ་འཇཊ་འགན་སྲུང་ཐད་ནས། འབྲུ་རིཊ་དང་ནུས་ཁུངས་བདེ་འཇཊ་སོགས་ལ་དམིཊ་ནས་ལས་གྲྭ་ཁག་6བཏོན་ཡོད།</p><p>2026ལོའི་ལས་འགན་གཙོ་བོ།</p><p>■ གྲོང་གསེབ་ཕྱོཊ་ཡོངས་ནས་དར་རྒྱས་ཡོང་བར་སྐུལ་འདེད་ཏན་ཏིག་གཏོང་དགོས།</p><p>“ཞིང་གསུམ”ལས་ཀ་དེ་གལ་ཆེའི་ནང་གི་གལ་ཆེན་དུ་འཛིན་རྒྱུ་རྒྱུན་འཁྱོངས་བྱེད་པ་དང་། “ཁྲི་སྟོང་ལས་གྲྭའི”ཉམས་མྱོང་སློབ་སྦྱོང་དང་བེད་སྤྱོད་གཏིང་ཟབ་བྱས་ཏེ། ཞིང་དར་ཞིང་ཕན་ཞིང་ཕྱུག་བཅས་ཀྱི་སྲིད་ཇུས་ཕན་ནུས་ཆེ་རུ་གཏོང་བ། ཞིང་ལས་དང་གྲོང་གསེབ་ཀྱི་རྨང་གཞི་སྔར་བས་ཇེ་བརྟན་དང་འཕེལ་རྒྱས་ཀྱི་སྤུས་ཚད་དང་ཕན་འབྲས་ཇེ་མཐོར་གཏོང་དགོས།</p><p>ལྷོད་གཡེང་སྤུ་ཙམ་མེད་པའི་སྒོ་ནས་འབྲུ་རིགས་ཐོན་སྐྱེད་ལ་དམ་འཛིན་ཡག་པོ་བྱེད་དགོས། ཐོན་འབོར་ཐོན་ནུས་དང་། ཐོན་སྐྱེད་སྐྱེ་ཁམས། ཐོན་འཕར་འབབ་འཕར་བཅས་ལ་མཉམ་དུ་དམ་འཛིན་བྱ་རྒྱུ་རྒྱུན་འཁྱོངས་བྱས་ཏེ། རེས་འཁོར་གསར་པའི་འབྲུ་རིགས་རྒྱ་མ་དུང་ཕྱུར་སྟོང་ཕྲག་ཐོན་ནུས་མཐོར་འདེགས་ཀྱི་བྱ་སྤྱོད་ལག་བསྟར་བྱེད་ཤུགས་ཆེ་རུ་གཏོང་དགོས། འབྲུ་སྣུམ་ཐོན་སྐྱེད་བརྟན་པོ་ཡོང་བ་དང་། ཞིང་བཟང་སོན་བཟང་དང་འཕྲུལ་ཆས་དང་ཐབས་ཤེས་བཟང་པོ་བཅས་གཅིག་བསྡུས་བྱས་ཏེ་ཐོན་འཕར་ཡོང་བར་སྐུལ་སྤེལ་བཏང་སྟེ། གཞི་ཁྱོན་ཆེ་བའི་མུའུ་རེའི་ཐོན་ཚད་མཐོ་རུ་གཏོང་བ་དང་། སོན་སྣ་ལེགས་གསོ། སྤུས་ཚད་མཐོར་འདེགས་བཅས་ལ་སྐུལ་འདེད་གཏོང་དགོས། སྲན་ཆེན་དང་སྣུམ་རྒྱུའི་ཐོན་ནུས་སྲ་བརྟན་དང་མཐོར་འདེགས་གཏོང་བ་དང་། སྲིང་མངར་འགྱིག་གསུམ་སོགས་ཐོན་བརྟན་སྤུས་འདེགས་ཡོང་བར་སྐུལ་འདེད་གཏོང་དགོས། ཞིང་ལས་ནགས་ལས་ཕྱུགས་ལས་ཉ་ལས་བཅས་མཉམ་སྤེལ་བྱ་རྒྱུ་རྒྱུན་འཁྱོངས་བྱེད་པ་དང་། ཟས་རིགས་སྣ་མང་འདོན་སྤྲོད་བྱེད་ཚད་མང་དུ་གཏོང་དགོས། རྨོ་ཞིང་གི་དམར་ཐིག་དམ་སྲུང་དང་། བཟུང་གསབ་དོ་མཉམ་ཡོང་བར་དོ་དམ་ནན་པོ་བྱེད་པ། ཚད་གཞི་མཐོ་བའི་ཞིང་ཁ་འཛུགས་སྐྲུན་བྱེད་པར་སྤུས་ཚད་མཐོ་བའི་སྒོ་ནས་སྐུལ་འདེད་གཏོང་བ། ས་ནག་སྲུང་སྐྱོབ་དང་བ་ཚྭ་ཅན་གྱི་ས་ཞིང་ཕྱོགས་བསྡུས་བེད་སྤྱོད་བྱེད་ཤུགས་ཆེ་རུ་གཏོང་བ་བཅས་བྱེད་དགོས།</p><p>རྒྱུན་རྣམ་ཅན་གྱི་གནད་འཁེལ་རོགས་སྐྱོར་ལག་བསྟར་བྱེད་དགོས། དབུལ་བྲལ་འགག་སྒྲོལ་གྱི་གྲུབ་འབྲས་རྒྱུན་མཐུད་སྲ་བརྟན་དང་རྒྱ་སྐྱེད་བཏང་སྟེ། རྒྱུན་རྣམ་ཅན་གྱི་རོགས་སྐྱོར་དེ་གྲོང་གསེབ་དར་རྒྱས་ཀྱི་འཐབ་ཇུས་ནང་བཅུག་ནས་གཅིག་འདོམས་ཀྱིས་ལག་བསྟར་བྱེད་པ་དང་། གཞི་ཁྱོན་རང་བཞིན་གྱི་དབུལ་ལོག་དབུལ་འགྱུར་མི་འབྱུང་བའི་མཐའ་ཚད་བརྟན་པོར་སྲུང་དགོས། རོགས་སྐྱོར་སྲིད་ཇུས་སྤྱིའི་ཆ་ནས་གཏན་འཇགས་ཡོང་བ་མཐའ་འཁྱོངས་བྱེད་དགོས། དབུལ་ལོག་དབུལ་འགྱུར་སྔོན་འགོག་བྱ་ཡུལ་ངོས་འཛིན་གྱི་ཚད་གཞི་ལུགས་མཐུན་སྒོས་གཏན་འཁེལ་བྱེད་པ་དང་། ལྟ་ཞིབ་ཚད་ལེན་དང་དབྱེ་འབྱེད་ཡག་པོ་བྱས་ཏེ། སྔ་ཙམ་ནས་ཤེས་རྟོགས་དང་། སྔ་ཙམ་ནས་ཐེ་གཏོགས། སྔ་ཙམ་ནས་རོགས་སྐྱོར་བཅས་བྱེད་པར་འགན་ལེན་ཏན་ཏིག་བྱེད་དགོས། ཐོན་ལས་དང་ལས་ཞུགས་སོགས་གསར་སྤེལ་རྣམ་པའི་རོགས་སྐྱོར་གྱི་ཕན་འབྲས་ཆེ་རུ་བཏང་ནས་སྤྱི་ཚོགས་རོགས་སྐྱོབ་ཀྱི་མཐའ་སྐྱོར་འགན་སྲུང་གི་ནུས་པ་འདོན་སྤེལ་བྱེད་དགོས། ཡུལ་གཞན་དུ་གནས་སྤོས་པའི་རྗེས་མཐུད་རོགས་སྐྱོར་མུ་མཐུད་ཡག་པོ་བྱེད་དགོས། ཤར་རྒྱུད་དང་ནུབ་རྒྱུད་བར་རོགས་ལས་དང་། དམིགས་བཙུགས་རོགས་སྐྱོར། གྲོང་ཚོར་བཅའ་སྡོད་རོགས་སྐྱོར། འཛད་སྤྱོད་རོགས་སྐྱོར་སོགས་འཐུས་ཚང་དུ་གཏོང་དགོས། དར་རྒྱས་འགྲོ་འགོར་བའི་ས་ཁུལ་ལ་རིཊ་དང་རིམ་པ་བཀར་ནས་རོཊ་སྐྱོར་བྱེད་པ་དང་། གྲོང་གསེབ་དར་རྒྱས་གཏོང་བའི་གཙོ་གནད་རོཏ་སྐྱོར་རྫོང་འཕེལ་རྒྱས་མགྱོཊ་སུ་གཏོང་བར་རྒྱབ་སྐྱོར་བྱས་ཏེ། ནང་སྐྱེས་སྒུལ་ཤུཊ་ཆེ་རུ་གཏོང་དགོས།</p><p>གྲོང་གསེབ་ཀྱི་སྒྱུར་བཅོས་འཕེལ་རྒྱས་ལ་རྒྱུན་མཐུད་སྐུལ་འདེད་གཏོང་དགོས། ཕྱོགས་ཡོངས་ནས་ས་ཞིང་འགན་གཙང་ལེན་པའི་རེས་འཁོར་གཉིས་པའི་དུས་ཡུན་འཐིམ་རྗེས་ཡང་བསྐྱར་ལོ་30རིང་ནར་འགྱངས་གཏོང་རྒྱུ་དེ་ཞིང་ཆེན་ཧྲིལ་པོར་ཚོད་ལྟ་བྱེད་པ་དང་། ཞིང་ལས་གཞི་ཁྱོན་རན་པོའི་གཉེར་སྐྱོང་འཕེལ་རྒྱས་གཏོང་བ། དེང་རབས་ཞིང་ལས་གཉེར་སྐྱོང་མ་ལག་དང་སྤྱི་ཚོགས་ཅན་གྱི་ཞབས་ཞུའི་མ་ལག་ཆ་ཚང་དུ་གཏོང་བ་བཅས་བྱེད་དགོས། གྲོང་གསེབ་ཀྱི་ཐུན་མོང་དཔལ་འབྱོར་དཔེ་གསར་གོང་དུ་སྤེལ་བར་རྒྱབ་སྐྱོར་བྱེད་དགོས། ཐུན་མོང་གི་ཐོན་དབང་དང་། ཐུན་མོང་གི་ནགས་ཚལ་བདག་དབང་། ས་རྒོད་གསར་སྦོལ། མཁོ་འཚོང་ཁང་སོགས་སྒྱུར་བཅོས་ཟབ་སྤེལ་བྱེད་དགོས། རྒྱལ་ཡོངས་ཀྱི་ཞིང་ལས་ཡོངས་བཤེར་ཐེངས་བཞི་པ་སྤེལ་དགོས། གྲོང་ཁྱེར་དང་གྲོང་གསེབ་ཀྱི་བདག་རྐྱེན་ཕྱོགས་གཉིས་ཀར་འཁོར་རྒྱུག་བྱེད་པར་སྐུལ་འདེད་གཏོང་བ་དང་། ཞིང་ལས་རིག་གནས་ཡུལ་སྐོར་སོགས་མཉམ་འདྲེས་འཕེལ་རྒྱས་ཟབ་སྤེལ་བྱེད་པ། གྲོང་གསེབ་ཀྱི་ཁྱད་ལྡན་ཐོན་ལས་སྐྱེད་སྲིང་དང་སྟོབས་ཆེར་གཏོང་བ། ཞིང་ལས་ཐོན་རྫས་ལས་སྣོན་ཞིབ་ཚགས་བྱེད་པའི་ཆུ་ཚད་མཐོ་རུ་གཏོང་བ། ནགས་འདབས་དཔལ་འབྱོར་འཕེལ་རྒྱས་གཏོང་བ། ཞིང་འབྲེལ་ཞིང་ཁྲིད་ཀྱི་ལམ་སྲོལ་འཐུས་ཚང་དུ་གཏོང་བ་བཅས་བྱས་ཏེ་ཞིང་པའི་ཡོང་འབབ་བརྟན་པོའི་ངང་འཕར་བར་སྐུལ་སྤེལ་གཏོང་དགོས།</p><p>■ གྲོང་ཁྱེར་དང་གྲོང་རྡལ་ཅན་དཔེ་གསར་དང་ས་ཁོངས་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་དགོས།</p><p>ས་ཁོངས་མཐུན་སྦྱོར་འཕེལ་རྒྱས་གཏོང་བའི་འཐབ་ཇུས་དང་། ས་ཁོངས་ཀྱི་འཐབ་ཇུས་གནད་ཆེན། གཙོ་ནུས་ཐོན་ཁུལ་གྱི་འཐབ་ཇུས། གྲོང་ཁྱེར་དང་གྲོང་རྡལ་ཅན་དཔེ་གསར་གྱི་འཐབ་ཇུས་བཅས་ལག་བསྟར་གཏིང་ཟབ་བྱས་ཏེ། དགེ་མཚན་གསབ་རེས་དང་སྤུས་ཚད་མཐོ་བའི་འཕེལ་རྒྱས་འགྲོ་བའི་ས་ཁོངས་དཔལ་འབྱོར་གྱི་བཀོད་པ་དང་རྒྱལ་ཁབ་མངའ་ཁོངས་བར་སྟོང་གི་མ་ལག་སྐྲུན་དགོས།</p><p>མི་རྩ་བར་འཛིན་པའི་གྲོང་ཁྱེར་དང་གྲོང་རྡལ་ཅན་དཔེ་གསར་ལ་སྐུལ་འདེད་གཏིང་ཟབ་གཏོང་དགོས། ཚན་རིག་དང་མཐུན་ཞིང་གོ་རིམ་ལྡན་པའི་སྒོ་ནས་ཞིང་ལས་སྤོ་སྒྱུར་མི་འབོར་གྲོང་ཁྱེར་པར་སྒྱུར་བར་སྐུལ་འདེད་གཏོང་བ་དང་། ཡུལ་བབ་དང་བསྟུན་ཏེ་འགྲོ་སའི་ཡུལ་ནས་འབྲིང་རྒྱུགས་ནང་ཞུགས་རྒྱུའི་མིང་ཐོ་འགོད་པའི་ཆ་རྐྱེན་ལྷུག་ཏུ་གཏོང་བ། “མི་ས་དངུལ་གསུམ”སྣ་སྦྲེལ་གྱི་སྲིད་ཇུས་སྔར་བས་འཐུས་ཚང་དུ་གཏོང་བ་བཅས་བྱེད་དགོས། རྫོང་ཁོངས་རྨང་གཞིའི་སྒྲིག་བཀོད་ཀྱི་བཀོད་པ་དང་སྤྱི་པའི་ཐོན་ཁུངས་བགོ་སྒྲིག་བྱེད་ཚུལ་ལེགས་སྒྱུར་དང་། རྫོང་ཁོངས་ཁྱད་ལྡན་ཐོན་ལས་འཕེལ་རྒྱས་བཏང་ནས། རྫོང་ཁོངས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་འགྲོ་བར་སྐུལ་འདེད་གཏོང་དགོས། གྲོང་ཁྱེར་ནང་རྒྱས་རྣམ་པའི་འཕེལ་རྒྱས་གཏོང་རྒྱུ་རྒྱུན་འཁྱོངས་བྱས་ནས་དེང་རབས་ཅན་གྱི་གྲོང་ཁྱེར་མ་ལག་ལེགས་སྒྱུར་བྱེད་དགོས། སྤུས་ཚད་མཐོ་བའི་སྒོ་ནས་གྲོང་ཁྱེར་གསར་སྒྱུར་བྱེད་པར་སྐུལ་འདེད་གཏོང་བ་དང་། གྲོང་ཁྱེར་དང་གྲོང་རྡལ་གྱི་གཞིས་ཁུལ་རྙིང་པ་དང་གྲོང་ཁྱེར་ནང་གི་གྲོང་ཚོ་སོགས་སྒྱུར་བཀོད་བརྟན་པོའི་ངང་ལག་བསྟར་བྱེད་དགོས། བསགས་འབོར་ས་ཆ་དང་བེད་མེད་དུ་བསྐྱུར་བའི་ཁང་པ་དང་སྒྲིག་བཀོད་གང་འགབ་ཅི་སྤྱོད་བྱེད་དགོས། གྲོང་ཁྱེར་གྱི་རྨང་གཞིའི་སྒྲིག་བཀོད་ཀྱི་སྲོག་རྩའི་བདེ་འཇགས་ལས་གྲྭ་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། ཁང་རྩེག་མཐོན་པོའི་མེ་སྐྱོན་འགོག་ཟོན་དང་རོགས་སྐྱོབ་བྱེད་ནུས་ཆེ་རུ་གཏོང་དགོས། གསར་གཏོད་ཅན་གྱི་ཐོན་ལས་སྡེ་ཁུལ་དང་ཚོང་དོན་སྡེ་ཁུལ་འཛུགས་སྐྲུན་བྱེད་པ་དང་། གྲོང་ཁྱེར་བཅོས་སྐྱོང་དེ་རིག་ལྡན་ཅན་དང་ཞིབ་ཚགས་ཅན་དུ་འགྱུར་བར་སྐུལ་འདེད་བཏང་སྟེ། དེང་རབས་ཅན་གྱི་མི་དམངས་གྲོང་ཁྱེར་འཛུགས་སྐྲུན་བྱེད་དགོས།</p><p>■ དམངས་འཚོ་འགན་སྲུང་དང་ལེགས་བཅོས་བྱེད་ཤུགས་སྔར་ལས་ཆེ་རུ་གཏོང་དགོས།</p><p>དམངས་འཚོ་དོན་ཆེན་དུ་འཛིན་རྒྱུ་རྒྱུན་འཁྱོངས་བྱེད་པ་དང་། ཀུན་ཕན་རང་བཞིན་དང་། རྨང་གཞིའི་རང་བཞིན། མཐའ་སྐྱོར་རང་བཞིན་བཅས་ཀྱི་དམངས་འཚོ་འཛུགས་སྐྲུན་ལ་ཤུགས་བརྒྱབ་སྟེ། མི་དམངས་མང་ཚོགས་ལ་དངོས་དོན་མང་ཙམ་འབད་པས་སྒྲུབ་གང་ཐུབ་བྱེད་དགོས</p><p>སྤུས་ཚད་མཐོ་བའི་ལས་ཞུགས་གང་ལེགས་ཡོང་བར་སྐུལ་སྤེལ་གཏོང་དགོས། སྲིད་ཇུས་སྣ་ཚོགས་ཀྱིས་ལས་ཞུགས་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་། མཛའ་མཐུན་ཅན་གྱི་ལས་ཞུགས་འཕེལ་རྒྱས་གཏོང་སྟངས་འཛུགས་དགོས། ལས་བརྟན་ཕྱིར་སློག་དང་། སྤྱི་ཚོགས་འགན་བཅོལ་ཁ་གསབ། ཆེད་དམིགས་དངུལ་བུན་སོགས་དུས་རིམ་རང་བཞིན་གྱི་བྱེད་ཐབས་རྒྱུན་མཐུད་ལག་བསྟར་བྱས་ཏེ། རྒུད་གསབ་ལས་སྤྲོད་ཀྱི་མ་དངུལ་འཇོག་ཁྱོན་སྔར་ལས་ཆེ་རུ་གཏོང་དགོས། ལས་བརྟན་ཤོང་སྐྱེད་སྤུས་འདེགས་བྱ་སྤྱོད་ལག་བསྟར་དང་། ངལ་རྩོལ་མང་འདུས་ཅན་གྱི་ལས་རིགས་དང་ཁེ་ལས་ཀྱི་ལས་གནས་བརྟན་པོ་ཡོང་བར་རྒྱབ་སྐྱོར། གསར་དར་ཐོན་ལས་དང་འབྱུང་འགྱུར་ཐོན་ལས་འཕེལ་རྒྱས་ལ་དམིགས་ནས་ལས་རིགས་གསར་པ་དང་ལས་གནས་གསར་པ་སྐྱེད་སྲིང་བཅས་བྱས་ཏེ། ཞབས་ཞུའི་ལས་རིགས་ཀྱིས་ལས་ཞུགས་ལ་སྐུལ་ཁྲིད་བྱེད་པའི་ནུས་པ་ཆེ་རུ་གཏོང་དགོས། མཐོ་རིམ་སློབ་གྲྭའི་སློབ་ཐོན་སློབ་མ་སོགས་གཞོན་ནུའི་ལས་ཞུགས་ལ་རྒྱབ་སྐྱོར་བྱེད་པའི་སྲིད་ཇུས་གཏན་འབེབས་དང་། ཞིང་པ་ལས་མིར་ལས་བརྟན་རོགས་སྐྱོར་བྱེད་ཤུགས་ཆེ་རུ་གཏོང་བ། དམག་ཞབས་འཐིམ་པའི་དམག་མི་བཀོད་སྒྲིག་དང་ལས་ཞུགས་ཞབས་ཞུ་ལེགས་པར་སྒྲུབ་པ། དཀའ་ངལ་ཡོད་པའི་མི་སྣའི་ལས་ཞུགས་རོགས་སྐྱོར་ལ་ཤུགས་རྒྱག་པ། སྐབས་བསྟུན་ལས་ཞུགས་དང་ལས་ཞུགས་རྣམ་པ་གསར་པའི་མི་སྣ་ལས་བཟོའི་འགན་བཅོལ་ནང་ཞུཊ་པར་རྒྱབ་སྐྱོར་བྱེད་པའི་སྲིད་ཇུས་འདོན་པ་བཅས་བྱེད་དགོས།</p><p>སློབ་གསོ་དྲང་སྙོམས་དང་སྤུས་ཚད་མཐོར་འདེགས་ཡོང་བར་སྐུལ་འདེད་གཏོང་དགོས། དུས་རབས་གསར་པའི་སྤྱོད་བཟང་དར་སྤེལ་དང་མི་སྣ་གསོ་སྐྱོང་བྱེད་པའི་ལས་གྲྭ་ལག་བསྟར་བྱེད་པ་དང་། བསམ་བློ་ཆབ་སྲིད་སློབ་ཚན་དང་སྤྱི་ཚོགས་སློབ་ཚན་མཉམ་འདྲེས་ནུས་ལྡན་ཡོང་བར་སྐུལ་སྤེལ་གཏོང་དགོས། སློབ་ལོ་རན་པའི་མི་འབོར་གྲུབ་ཚུལ་གྱི་འགྱུར་ལྡོག་དང་འཚམ་པར་བྱས་ཏེ་སློབ་གསོའི་ཐོན་ཁུངས་ཀྱི་བཀོད་པའི་གྲུབ་ཚུལ་ལེགས་སྒྲིག་བྱེད་པར་སྐུལ་འདེད་གཏོང་དགོས། རྨང་གཞིའི་སློབ་གསོ་ལེགས་སྐྱེད་སྤུས་འདེགས་གཏོང་བར་སྐུལ་འདེད་དང་། འོས་འགན་སློབ་གསོ་སྤུས་ལེགས་དང་དོ་མཉམ་ངང་འཕེལ་རྒྱས་འགྲོ་བ་དང་སློབ་ཞུགས་གོང་གི་སློབ་གསོ་སྤུས་ལེགས་དང་ཀུན་ཕན་ངང་འཕེལ་རྒྱས་འགྲོ་བར་གཅིག་གྱུར་འཆར་འགོད་བྱེད་པ། སློབ་ཞུཊ་གོང་གི་རིན་མེད་སློབ་གསོའི་སྲིད་ཇུས་འཐུས་ཚང་དུ་གཏོང་བ། མཐོ་འབྲིང་དཀྱུས་མའི་བསླབ་གནས་འདོན་སྤྲོད་བྱེད་ཚད་མང་དུ་གཏོང་བ་བཅས་བྱེད་དགོས།</p><p>གཞི་རྩའི་སྨན་བཅོས་འཕྲོད་བསྟེན་ཞབས་ཞུར་ཤུགས་རྒྱག་དགོས། བདེ་ཐང་དམིགས་བསལ་གྱིས་སྔོན་ལ་འཕེལ་རྒྱས་གཏོང་བའི་འཐབ་ཇུས་ལག་བསྟར་བྱེད་པ་དང་། བདེ་ཐང་ལ་སྐུལ་སྤེལ་གཏོང་བའི་སྲིད་ཇུས་ལམ་ལུགས་མ་ལག་ཆ་ཚང་དུ་གཏོང་བ། རྒྱལ་གཅེས་འཕྲོད་བསྟེན་ལས་འགུལ་གྱི་ཕན་འབྲས་ཆེ་རུ་གཏོང་བ། སྤྱི་པའི་འཕྲོད་བསྟེན་ནུས་པ་ཆེ་རུ་གཏོང་བ་བཅས་བྱེད་དགོས། གྲོང་མིའི་སྨན་བཅོས་འགན་བཅོལ་གྲོན་དངུལ་ལ་ནོར་སྲིད་ཀྱིས་མི་རེར་ཆ་སྙོམས་ཀྱི་ཁ་གསབ་སྤྲོད་པའི་ཚད་གཞི་སྒོར་24མཐོ་རུ་གཏོང་དགོས། རིམ་པ་མང་བའི་སྨན་བཅོས་འགན་སྲུང་མ་ལག་ཆ་ཚང་དུ་གཏོང་བ་དང་། གཞི་རྩའི་སྨན་བཅོས་འགན་བཅོལ་ཞིང་ཆེན་རིམ་པས་གཅིག་གྱུར་འཆར་འགོད་བྱེད་པར་བརྟན་པོའི་ངང་སྐུལ་འདེད་གཏོང་བ། གསོ་རིག་སྨན་རྫས་གཅིག་བསྡུས་ཀྱིས་ཉོ་སྒྲུབ་དང་རིན་གོང་བཅོས་སྐྱོང་བྱེད་ཚུལ་ལེགས་སྒྱུར། སྨན་བཅོས་འགན་བཅོལ་གྱི་གྲོན་དངུལ་གཏོང་སྤྲོད་བྱེད་སྟངས་སྒྱུར་བཅོས་ཟབ་སྤེལ། ལྷག་འཕྲོའི་མ་དངུལ་བེད་སྤྱོད་སྲིད་ཇུས་འཐུས་ཚང་དུ་གཏོང་བ་བཅས་བྱེད་དགོས།</p><p>སྤྱི་ཚོགས་འགན་སྲུང་དང་ཞབས་ཞུར་ཤུགས་རྒྱག་དགོས། གྲོང་ཁྱེར་དང་གྲོང་གསེབ་ཀྱི་གྲོང་མིའི་རྨང་གཞིའི་རྒན་གསོའི་དངུལ་ཟླ་རེའི་ཚད་གཞི་དམའ་ཤོས་སླར་ཡང་སྒོར་20ཇེ་མཐོར་གཏོང་དགོས། གཞི་རྩའི་རྒན་གསོའི་འགན་བཅོལ་རྒྱལ་ཡོངས་སུ་གཅིག་གྱུར་འཆར་འགོད་བྱེད་པའི་ལམ་ལུགས་འཐུས་ཚང་དུ་གཏོང་བ་མ་ཟད་དོན་འཁྱོལ་བྱེད་པ་དང་། ལས་ཤོར་དང་ལས་རྨས་འགན་བཅོལ་གྱི་ཁེབས་རྒྱ་ཆེ་རུ་གཏོང་བ། ལས་རིགས་རྨས་སྐྱོན་འགན་སྲུང་གི་ཚོད་ལྟ་བྱེད་ཁྱོན་ཆེ་རུ་གཏོང་བར་བརྟན་པོ་དང་གོ་རིམ་ལྡན་པའི་སྒོ་ནས་སྐུལ་འདེད་གཏོང་བ། སྤྱི་ཚོགས་འགན་བཅོལ་གྱི་འབྲེལ་བ་སྤོ་སྒྱུར་དང་འཕྲོ་མཐུད་སྲིད་ཇུས་ཆ་ཚང་དུ་གཏོང་བ་བཅས་བྱེད་དགོས། མི་འབོར་རྒན་རྒོན་ཅན་དུ་འགྱུར་བར་ཁ་གཏད་ཧུར་ཐག་འཇལ་བའི་རྒྱལ་ཁབ་ཀྱི་འཐབ་ཇུས་ལག་བསྟར་གཏིང་ཟབ་བྱེད་པ་དང་། ཀུན་ཕན་རྒན་གསོའི་ཞབས་ཞུ་འདོན་སྤྲོད་བྱེད་རྒྱ་ཆེ་རུ་གཏོང་བ། གྲོང་གསེབ་ཀྱི་རྒན་གསོའི་ཞབས་ཞུ་ཧུར་ཐག་གིས་འཕེལ་རྒྱས་གཏོང་བ། ཚད་འབྲིང་ཙམ་ཡན་གྱི་ནུས་ཉམས་རྒན་རྒོན་ལ་རྒན་གསོའི་ཞབས་ཞུའི་འཛད་སྤྱོད་ཁ་གསབ་སྤྲོད་པའི་ལས་གཞི་ལག་བསྟར་བྱེད་པ། རྒན་རྒོན་གྱི་མི་ཤུགས་ཐོན་ཁུངས་གསར་སྤེལ་ཧུར་ཐག་བྱེད་པ། སྐྲ་དཀར་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བྱེད་ཐབས་བཟོ་བ། རྒན་རྒོན་གྱི་མཁོ་ཆས་ཐོན་རྫས་དང་། རྒན་གསོའི་དངུལ་རྩ། བྱེས་སྡོད་རྒན་གསོ་སོགས་ཀྱི་རྒྱབ་སྐྱོར་སྲིད་ཇུས་འཐུས་ཚང་དུ་གཏོང་བ་བཅས་བྱེད་དགོས། ཁམས་གསོ་ནད་སྐྱོང་ཤོང་སྐྱེད་མཐོར་འདེགས་ལས་གྲྭ་ལག་བསྟར་བྱེད་དགོས། ཡུན་རིང་ནད་སྐྱོང་འགན་བཅོལ་ལམ་ལུགས་ཁྱབ་སྤེལ་གཏོང་དགོས། ཁེར་སྡོད་རྒན་རྒོན་དང་ནུས་ཉམས་རིག་ཉམས་སོགས་དཀའ་ངལ་ཡོད་པའི་མི་ཚོགས་ལ་གཅེས་སྐྱོང་དང་རོགས་སྐྱོར་ཡག་པོ་བྱེད་དགོས། དགེ་མཚན་ལྡན་པའི་གཉེན་སྒྲིག་དང་ཕྲུ་གུ་སྐྱེ་གསོའི་ལྟ་བ་དར་སྤེལ་གཏོང་དགོས། གཉེན་སྒྲིག་ཐེངས་དང་པོ་བྱས་པ་དང་ཕྲུ་གུ་ཐོག་མ་བཙས་པའི་ཁྱིམ་ཚང་གི་སྡོད་ཁང་འགན་སྲུང་བྱེད་ཤུགས་ཆེ་རུ་གཏོང་བ་དང་། བུ་བཙའི་འགན་བཅོལ་ལམ་ལུཊ་དང་བུ་བཙའི་གུང་གསེང་ལམ་ལུཊ་འཐུས་ཚང་དུ་གཏོང་དགོས། བཅོལ་གསོའི་ཞབས་ཞུའི་གསབ་དངུལ་སྤྲོད་པའི་དཔེ་སྟོན་ཚོད་ལྟ་བྱེད་གནས་གཏིང་ཟབ་ཏུ་སྤེལ་བ་དང་། ཀུན་ཕན་བཅོལ་གསོ་དང་བུ་བཅོལ་བྱིས་གསོ་གཞི་གཅིག་ཅན་གྱི་ཞབས་ཞུ་འཕེལ་རྒྱས་གཏོང་དགོས། དབང་པོར་སྐྱོན་འབྱུང་བ་སྔོན་འགོག་དང་། ཁམས་གསོ། བཅོལ་གསོ། ལྟ་སྐྱོང་བཅས་ཀྱི་ཞབས་ཞུར་ཤུགས་རྒྱག་པ་དང་། རྒན་གསོ་དང་དབང་པོ་སྐྱོན་ཅན་ལ་རོགས་སྐྱོར་བྱེད་པའི་ཐོན་ཁུངས་གཅིག་འདོམས་ཀྱིས་བེད་སྤྱོད་བྱེད་པར་སྐུལ་འདེད་གཏོང་དགོས། དཀའ་ངལ་ཡོད་པའི་བྱིས་པར་གཅེས་སྐྱོང་བྱེད་པའི་ཞབས་ཞུ་ཡག་པོ་སྒྲུབ་པ་དང་། བུད་མེད་དང་བྱིས་པའི་ཁྲིམས་མཐུན་ཁེ་དབང་འགན་སྲུང་བྱེད་དགོས། དམག་མི་དང་དམག་མིའི་ནང་མི། དམག་ཞབས་འཐིམ་པའི་དམག་མི་དང་གཟིགས་སྐྱོང་བྱ་ཡུལ་གཞན་དག་བཅས་ཀྱི་ཞབས་ཞུ་འགན་སྲུང་བྱེད་ཤུགས་ཆེ་རུ་གཏོང་དགོས། གཞི་རྩའི་པུར་སྐྱེལ་དུར་འཇུག་གི་ཞབས་ཞུའི་ལམ་ལུཊ་འཛུཊ་པ་དང་ཆ་ཚང་དུ་གཏོང་དགོས། རིགས་དང་རིམ་པ་བཀར་ནས་སྤྱི་ཚོཊ་རོགས་སྐྱོབ་ཀྱི་ལས་དོན་ཡག་པོ་བསྒྲུབས་ཏེ་དམངས་འཚོའི་མཐའ་ཚད་སྲུང་ཅི་ཐུབ་དང་བརྟན་པོར་སྲུང་དགོས།</p>