<div style='font-size: 22px!important;line-height: 34px!important;text-align: justify!important;color: #000!important'>༄༅། །དྲན་པའི་ཟབ་ས།</div><div style='font-size: 16px!important;line-height: 28px!important;text-align: justify;color: #777!important;margin-top: 20px;'>རང་མདངས།</div><div style='font-size: 14px!important;line-height: 22px!important;text-align: left!important;color: #777!important;margin-top: 20px;'>林芝报-藏文版&nbsp&nbsp2025-11-21</div><div><img id='paperImg' style='max-width: 100%;height: auto' src='//img.founderfx.cn/epaper/202511/27/36d3809fddd44bad877dd7dc06a0788e/3.jpg' alt='' class='page-img'/></div><p>ཉི་ཟེར་རི་རྩེར་འཁྱུད་པའི་ཞོགས་དུས་སུ། ། </p><p>ཟླ་འོད་མཐོན་མཐིང་དབྱིངས་སུ་རྒྱུ་དུས་དེར། ། </p><p>སྡེབ་ལེགས་སོར་མོའི་འདེགས་འཇོག་དབྱངས་ལ་བཀུག ། </p><p>ངག་རིག་རྒྱ་མཚོ་འཁྱིལ་བའི་ལྷ་མོ་དྲན། ། </p><p>དཔྱིད་ཀྱི་ལྷ་བྱའི་གསུང་སྙན་ཏིང་ཏིང་གྲགས། །</p><p>ཟངས་ཀྱི་ཉི་འོད་ཕོག་པའི་རི་བོ་ལ། ། </p><p>ན་བུན་སྤྲིན་དཀར་འཐུག་པོས་སྐེད་འཆིང་རྒྱག །</p><p>ཞོགས་པའི་ཅང་བརྡ་གྲགས་དུས་ལྷ་མོ་དྲན། ། </p><p>མ་གྲོས་རུ་སྡེ་འགྲིག་པའི་ཚོར་བའི་གར། ། </p><p>མ་བཅོས་དབྱངས་བདུན་ཀློང་ནས་ལྟད་མོ་ཅན། ། </p><p>མ་བསླད་སྤྱན་ཟུང་སྒུལ་བའི་དཔྱིད་དུས་སུ། ། </p><p>མ་བྲིས་ལང་ཚོ་སྟོང་ལྡན་ལྷ་མོ་དྲན། །</p><p> དཀའ་བ་བརྒྱ་ཕྲག་བགྱིས་པའི་ཕར་ངོགས་ན། །</p><p>དྭངས་གསལ་ཡིད་ཀྱི་སྣང་ངོར་ཤར་བའི་འཛུམ། །</p><p>ཁྱོད་ཞལ་ལང་ཚོས་རེག་པའི་དཔལ་ཙམ་གྱིས། །</p><p>དམར་ཆུང་སྙིང་གི་བྱུ་རུ་ཅི་དགར་རོལ། །</p><p>རྣ་བར་གཟན་ཀྱང་སྙིང་གཏམ་ལྷབ་ལྷུབ་བཤད། །</p><p>དྲན་པ་འཕར་ཡང་ནང་སེམས་ཟླ་བའི་སྤྲིན། །</p><p>དལ་གྱིས་འཁྱུད་པའི་རྣམ་ཤེས་དག་པའི་ངོས། །</p><p>ཁྱོད་རང་འདྲིས་པ་ལན་གྲངས་གཅིག་གཉིས་མིན། །</p><p>ཉམ་ཆུང་ཁ་སྟབས་འདི་ཡིས་ཁྱོད་རང་འཚོལ། ། </p><p>དཔེ་མེད་ཡིད་འོང་མདངས་ལྡན་མཛེས་མའི་ཞལ། ། </p><p>སེམས་སོང་ཡིད་ཀྱི་ཕྱི་ནང་ཁེངས་པའི་ཁྱོད། །</p><p>རྨི་ལམ་མཚན་མོའི་ཟུར་ཡང་བརྗེད་མྱོང་མེད། །</p>